Kanya Bhoj

KANYA BHOJ

O manushya

kanya khilane ki taiyaari kar raha hai?

pichli navtari se is navratri tak 

kitni deviyon ko pooja hai tune?

kokh mein beti ko maarna nahi 

yeh kehte ghoomta tha naa tu?

kokh se bahar aane k baad 

kitni betiyon ki raksha ki hai tune?

betiyon ko padhne do khelne do 

jeene do yeh kehte ghoomta tha naa tu?

kitni betiyon ko chulhe chauke

aur parivaar k bich apni icchayein 

hom karne se roka hai tune ?

betiyan rehne se jeevan sundar rehta hai 

yeh kehte ghoomta tha naa tu?

tab dusre ki beti ka jeevan 

sundar kyu nahi bana paaya tu?

betiyaan bojh nahi hoti yeh bhi 

toh kehte thakta nahi tha tu?

apni byaahta ko bojh kehne aur use 

yeh sunane se kyu nahi thakta tu?

beti parivaar ki aan hoti hai 

yeh kehta aur maanta bhi toh tha tu!

fir dusre parivaar ki aan ki aankh mein 

aansoon aane se kyu nahi rok paaya tu?

Apni beti Apni maa Apni behen aur 

Dusre ki beti sab ek hi toh hai manushya

lekin aurat aurat mein aur 

rishte rishte mein fark karne 

se khudko kaha rok paaya tu ?

Mera parivaar mere parivaar ki beti

Dusre ka parivaar Dusre parivaar ki beti

bas isi uljhan mein reh gaya tu 

Har roop Devi ka hai

yeh kaha jaan paaya tu

Samajsewa ki shuraat ghar se kar manushya

ghar ki mahilaaon ko sukhi kar manushya

tu dekhna saare devta khud hi tar jaayenge

Bhavsagar paar ho jayega

lekin shayad tujhse yeh na ho paayega

tu toh sirf Navratri pe Kanya bhoj karayega!!